عربی زبان میں وصیت کا لفظ نصیحت کے معنی میں بھی استعمال ہوتا ہے اور وصیت کے معنی میں بھی۔ زیر نظر مجموعے میں آپ ﷺ کی ایسی ہی وصیتوں کو جمع کرنے کی کوشش کی گئی ہے تاکہ ان سے استفادہ کرنا آسان ہو جائے۔ ان میں سے کچھ وصیتیں خاص خاص موقعوں پر آپﷺ نے عام طور پر فرمائی تھیں اور کچھ بعض صحابہ کرامؓ کے لیے مخصوص طور پر، لیکن وہ بھی تمام مسلمانوں کے لیے عام ہیں اور ان کی افادیت رہتی دنیا تک قائم رہے گی۔

ان وصیتوں میں عقائد و عبادات سے لے کر معاشرتی آداب و اخلاق اور اسلامی طرز زندگی کے مختلف گوشوں پر روشنی ڈالی گئی ہے اور واضح رہنمائی دی گئی ہے۔ اللہ تعالیٰ ہم سب کو ان سے زیادہ سے زیادہ فائدہ اٹھانے ، ان سے رہنمائی حاصل کرنے اور پورے اخلاص کے ساتھ ان پر عمل کرنے کی توفیق عطا فرمائے۔